Адвечны голас Радзімы
21 лютага ўвесь свет святкаваў Міжнародны дзень роднай мовы.
Для вучняў Рэплеўскага дзіцячага сада – сярэдняй школы гэтае свята стала выдатнай нагодай, каб паразмаўляць на роднай мове не толькі на ўроках, але і на працягу цэлага тыдня. Менавіта акцыяй “Размаўляй са мной па-беларуску” пачаўся Тыдзень беларускай мовы і літаратуры, падчас якога вучні мелі магчымасць актыўна паўдзельнічаць у самых разнастайных мерапрыемствах і паказаць свае веды, уменні і творчыя здольнасці. Для вучняў 1-4 класаў у рамках Тыдня была арганізавана выстава дзіцячых малюнкаў па творах беларускіх пісьменнікаў “Зорны россып творчасці, вучні 5-8 класаў спаборнічалі ў ведах і хуткасці ў квэст-гульні “Жыві і квітней, родная мова!”, паказалі ўменне працаваць у камандзе падчас віктарыны ”Знаўцы роднай мовы”. Старшакласнікі прадэманстравалі добрае веданне гісторыі, беларускай літаратуры, роднай мовы, традыцый і культуры нашага народа ў “Моўным турніры” і інтэлектуальнай гульні “БелаВеды”. У школьнай бібліятэцы была арганізавана выставыа кніг “Пісьменнікі-юбіляры”, а ў кабінеце беларускай мовы аформлены стэнд да Міжнароднага дня роднай мовы. Непасрэдна ў дзень свята, 21 лютага, педагогі і супрацоўнікі ўстановы адукацыі прынялі ўдзел у напісанні Гродзенскага абласнога дыктанта “Музей паэта”.
Можна ўпэўнена сказаць, што ўсе ўдзельнікі мерапрыемстваў Тыдня адчулі сапраўднае задавальненне, слухаючы родную мову, гаворачы на ёй, убіраючы ў сябе яе сакавітае гучанне і непаўторны каларыт. Наша мова, мова Скарыны і Буданага, Купалы і Коласа – гэта не проста сродак зносін, гэта жывая повязь пакаленняў, знак прысутнасці чалавека на зямлі. Родная мова – гэта адвечны голас Радзімы.
